Кучайтирилган санитария-гигиена назорати жорий йилнинг 1 августига қадар сақлаб қолинади

Кучайтирилган санитария-гигиена назорати жорий йилнинг 1 августига қадар сақлаб қолинади

            Сўнгги марта Ўзбекистонда «қизил», «сариқ» ва «яшил» ҳудудларга ажратиш тартиби, шунингдек, кучайтирилган санитария-гигиена назорати 15 июнгача узайтирилганди.

Республика махсус комиссияси бир қатор карантин қоидаларини енгиллаштиргани ҳақида хабар берган эди. 15 июндан бошлаб «яшил» ва «сариқ» ҳудудларда умумий овқатланиш объектлари, мактабгача таълим ташкилотлари ва буюм бозорлари фаолиятига муайян шартлар асосида рухсат берилмоқда. Бунда белгиланган шартларга риоя қилиш керак бўлади.

Шу билан бир қаторда, жамоат жойларида тиббий ниқобдан ва антисептик воситалардан фойдаланган ҳолда ҳаракатланиш бўйича санитария-гигиена талабига қатъий риоя этилиши, шу жумладан ижтимоий масофани сақланиши устидан назоратни кучайтириш белгиланмоқда.

Республика махсус комиссиясининг қарорига мувофиқ, «қизил», «сариқ» ва «яшил» ҳудудларга ажратиш тартиби, шунингдек, кучайтирилган санитария-гигиена назорати жорий йилнинг 1 августига қадар сақлаб қолинади.

Энди карантин харажатини карантин талабларини бузган қоплайдиган бўлади.

«Карантин чекловлари шароитида фаолият юритишига рухсат берилган тадбиркорлик субъектларига (қурилиш, умумий овқатланиш, хизмат кўрсатиш объектлари ва бошқалар) тегишли объектларда белгиланган санитария-гигиена талабларига риоя этмаслик оқибатида коронавирус инфекцияси аниқланган тақдирда ушбу объектларни ва шахсларни карантинга олиш ҳамда сақлаш билан боғлиқ харажатлар мазкур субъектлар ҳисобидан қопланиши белгиланди», дейилади махсус комиссия ахборотида.