“Мовий афсона”
“Мовий афсона”
Бадиий кўргазмалар дирекциясининг Марказий кўргазмалар залида ғурумсаройлик уста-кулол Ваҳобжон Буваевнинг “Мовий афсона”номли шахсий кўргазмаси очилди.
Кўргазмадан устанинг 200 дан ортиқ кулолчилик буюмлари ўрин олган. Шунингдек, устанинг шогирдлари – Б.Ҳакимов, А.Валижонов, Ш.Қодиров, Б.Орипов, Х.Умаров, Қ.Юсуфжоновларнинг буюмлари ҳам кўргазма экспозициясида жойланган.
Ваҳобжон Буваев 1969 йилда Ғурумсаройда таваллуд топган. У Ғурумсарой кулолчилиги сирларини таниқли, моҳир уста Махсудали Туроповдан ўрганган. В.Буваев Ғурумсарой мактабининг сўниб бораётган анъаналарини қайта тиклаш йўлида изланишлар олиб бормоқда. Уста ҳунармандчилик сирларини ўзлаштиришга муваффақ бўлиб, анъанавий усулларда ижод қилмоқда. Шаклларнинг уйғунлигини ва нақшли-тасвирий безакларни сақлаб қолмоқда.
Буюмлар колоритида Буваев оқ фонда кўкиш яшил рангни қўллайди. Ишларини безашда уста анаъанага мувофиқ “чорбарг”, “бутсимон безак”, “хўроз тожи” каби мотивларнинг турли кўринишлари, кўпқиррали юлдузсимон шакллардан фойдаланади.
В.Буваев ясаган буюмларда Ғурумсарой кулолчилигига хос маҳобатлилик, услубий архаиклик, ўсимликсимон мотивларнинг ёрқинлиги сақланади. Шу билан бирга, айтиш лозимки, уста ўз ижодида мовий ранг етакчилигига интилиш сезилади. Ранг ечими яхлитлиги, уйғунлилиги ва ўзига хослиги билан ажралиб туради.
ЎзА
