Мажбурий эмлашга оид қонун имзоланди
Мажбурий эмлашга оид қонун имзоланди
«Ўзбекистон Республикасининг айрим қонун ҳужжатларига аҳолининг санитария-эпидемиологик осойишталигини таъминлашга қаратилган ўзгартишлар ва қўшимча киритиш тўғрисида»ги Қонун Президент томонидан имзоланди. Унга кўра, энди қонунан иш берувчи эмланмаган ходимни ишга қўймасликка ҳақли. Шунингдек, бош давлат санитария врачи мажбурий эмлашни жорий қилиши мумкин.
Қонун билан Меҳнат кодексининг 113-моддасига ходим карантинли ва юқумли касалликлар таҳдиди бўлганда Бош давлат санитария врачи қарори асосида профилактик эмлашдан ўтишни рад этса (қарши кўрсатма мавжуд бўлмаганда) иш берувчи уни ишга қўймасликка ҳақли эканлигига оид кўшимча киритилди.
«Фуқаролар соғлиғини сақлаш тўғрисида»ги Қонунга киритилган қўшимчага кўра карантинли ва хавфли юқумли касалликлар тарқалиши таҳдиди бўлганда Бош давлат санитария врачининг қарори асосида аҳолини профилактик эмлашдан ўтказиш жорий этилиши белгиланди.
Қонун расмий эълон қилингандан сўнг кучга киради.
