Маданий мерос агентлиги 2024 йил учун 50 миллионлик грант ажратди

Маданий мерос агентлиги 2024 йил учун 50 миллионлик грант ажратди

Ўзбекистон Республикаси Маданий мерос агентлиги музейлар фаолиятини такомиллаштириш ва музейларда замонавий маркетинг ва менежментни йўлга қўйиш мақсадида “Ўзбек халқининг маданий ва моддий мероси жаҳон цивилизацияси тараққиётида халқлараро маданий кўприкдир” мавзусида 2024 йил учун грантлар ажратиш учун танловни эълон қилади.

Танловда барча – фуқаролигидан қатъий назар 16 ёшга тўлган жисмоний ва юридик шахслар иштирок этиши мумкин.

Танловга нодавлат нотижорат ташкилотлари, оммавий ахборот воситалари ва фуқаролик жамиятининг бошқа институтлари томонидан тақдим этилган қуйидаги мақсадларни назарда тутувчи халқаро стандартларга молик лойиҳалар қабул қилинади:

1.  Музейларда замонавий маркетинг ва менежментни йўлга қўйиш.

2.  Музейларнинг илмий-тадқиқот ишларини кучайтириш.

3. Музей ашёлари ва коллекцияларини реставрация ва консервация қилиш.

4. Соҳада замонавий технологияларни, шу жумладан, 7Д голограмма шоуларни фаол татбиқ этиш.

5. Музей тарихи, ашёлар ва коллекцияларни тарғиб қилиш.

6. Музейларга оид энг сара китоб, каталог ва бошқа нашрларни чоп этиш.

Грант ажратиш учун қуйидаги ҳужжатлар тақдим этилади:

1. Ташкилот раҳбари томонидан имзоланган ва муҳр билан тасдиқланган кузатув хати.

2. Грант лойиҳаси учун иштирокчининг аризаси (Агентлик веб сайтида шаблон киритилган).

3. Иштирокчи жисмоний шахс бўлган ҳолларда шахсини тасдиқловчи ҳужжатлари.

4. Охирги ўзгартиш ва қўшимчалар билан давлат рўйхатидан ўтган ННТлар ва фуқаролик жамияти бошқа институтларининг Устави (Низоми) нусхаси.

5. Ташкилотнинг давлат рўйхатидан ўтганлиги тўғрисидаги гувоҳнома нусхаси.

6. Агар лойиҳани амалга ошириш лицензияланадиган фаолиятни талаб қилса, унда лицензиянинг нусхаси.

7. Манфаатдор давлат ва жамоат ташкилотларининг тавсия ҳамда қўллаб-қувватлаш хатлари.

Битта лойиҳа учун ажратиладиган грант миқдори – 50 миллион сўмгача.

Ҳужжатлар 2023 йил 15 ноябрдан 15 декабргача қабул қилинади.

Ҳужжатларни тақдим этиш шартлари ва намуналари билан Ўзбекистон Республикаси Маданий мерос агентлигининг расмий веб-сайтида 2023 йилнинг 1 ноябридан бошлаб танишиш мумкин.