“Ислом цивилизация ташаббусларининг тикланиши”

“Ислом цивилизация ташаббусларининг тикланиши”

Имом Бухорий халқаро илмий-тадқиқот марказида Малайзия исломни англаш институтининг илмий делегацияси аъзолари иштирокида “Ислом цивилизация ташаббусларининг тикланиши” мавзусида халқаро давра суҳбати ташкил этилди.

“Bukhari.uz”нинг хабар беришича,  давра суҳбатида Марказий Осиё уламоларининг ислом цивилизацияси тараққиётига қўшган ҳиссаси ва глобаллашув шароитида ислом цивилизациясининг ташаббуслари йўналишларида туркум маърузалар тингланди. Иштирокчилар Мовароуннаҳрда ҳадис илмининг ривожланишида бу улуғ заминдан етишиб чиққан муҳаддис олимларнинг ўрни, Алоуддин Усмандийнинг мотуридийлик калом мактаби ривожига қўшган ҳиссаси билан бирга, Малайзия Федерал конституциясида исломнинг мавқеи, исломда илмнинг юксак мақоми, экстремизм ва радикализмнинг олдини олиш бўйича Малайзия тажрибасини кенг муҳокама қилигди.

Диннинг асл моҳиятини тўлиқ англаш, динлараро толерантликни янада кучайтириш, исломнинг инсонпарварлик ва тинчлик каби қадриятларини кенг тарғиб қилишда Мовароуннаҳрда яшаб ижод этган мутафаккирлар илмий меросига таяниб иш кўриш, шунингдек, миллатлараро тотувликни таъминлаш иши умумбашарий миқёс касб этиши лозимлиги қатнашчилар томонидан якдил тарзда қайд қилинди.

Шунингдек, диний бағрикенглик тамойилларини ҳаётга кенгроқ татбиқ этиш, алломалар асарларидаги эзгу ғоялар тарғиботини жадаллаштириш, эътиқод ва виждон эркинлигини таъминлаш юзасидан қатор таклиф ва тавсиялар билдирилди.