Германия элчиси: “Ҳақиқатан ҳам жаҳон миқёсидаги буюк лойиҳа”
Германия элчиси: “Ҳақиқатан ҳам жаҳон миқёсидаги буюк лойиҳа”
Тошкентда яқинда очилган Ўзбекистондаги Ислом цивилизацияси маркази қисқа фурсатда жаҳон нигоҳини ўзига қаратди. Минг йиллик тарих, ноёб артефактлар ва замонавий технологиялар уйғунлашган ушбу маскан Президент Шавкат Мирзиёев ташаббуси билан барпо этилган бўлиб, бугун нафақат музей, балки глобал илмий ва маънавий марказ сифатида шаклланмоқда. Шунингдек, халқаро жамоатчилик томонидан мамлакат маданий-илмий ҳаётида муҳим воқеа сифатида баҳоланмоқда.
Германия Федератив Республикасининг Ўзбекистондаги фавқулодда ва мухтор элчиси Манфред Хутерер ҳам Марказ музейи экспозициялари билан танишаркан, бу эътирофлар бежиз эмаслигига гувоҳ бўлди.
Меҳмон ҳар бир экспозицияни катта қизиқиш билан кузатар экан, Марказнинг илмий мазмуни ва тақдимот услуби унда чуқур таассурот қолдирди.
Исломдан аввалги давр экспозициясида намойиш этилган Бронза даврига оид, Марказий Осиё халқларининг қадимий дунёқараши ва мифологик тафаккурини ўзида мужассам этган, Буюк Британиядан Ўзбекистонга олиб келинган 3000 йиллик тарихга эга ноёб бронза буғу ҳайкали ва самовий отлар тарихи элчининг алоҳида эътиборини тортди. Ушбу экспонатлар орқали қадимий цивилизациялар дунёқараши, инсон ва табиат ўртасидаги уйғунлик ғояси жуда таъсирчан акс эттирилгани қайд этилди.
Биринчи Ренессанс даври экпсозициясида эса Самарқанд қоғози намуналари, Каъба кисваси ва астрономик асбоблар — устурлоблар элчининг эътиборини тортди. Ушбу экспозициялар орқали илм-фан ва маърифатнинг юксак босқичга чиққанини, ислом цивилизациясида билим олишга бўлган эҳтиром нечоғлик баланд бўлганини алоҳида таъкидлади.
Иккинчи Ренессанс даврига бағишланган экспозицияда Амир Темур давлати ва унинг маданий-илмий муҳити кенг ёритилгани меҳмонда чуқур таассурот қолдирди. Айниқса, сарой кутубхонаси ва буюк саркарда ҳақида немис тилида ёзилган манбалар Германия элчисини алоҳида қизиқтирди. У мазкур жиҳат орқали тарихий алоқаларнинг узвийлиги намоён этилганини қайд этди.
“Янги Ўзбекистон — Янги Ренессанс пойдевори” бўлимида мамлакатнинг замонавий тараққиёти, давлат раҳбарлари фаолияти ва стратегик йўналишлар кенг ёритилган. Айниқса, ёшларга бағишланган бўлим, уларнинг ютуқлари ва имкониятлари элчида катта таассурот қолдирди. Ушбу экспозиция орқали мамлакат келажаги айнан билимли ва салоҳиятли ёшлар билан боғлиқ экани яққол намоён бўлгани таъкидланди.
Қуръони карим зали эса элчини алоҳида тўлқинлантирди. Залдаги мэппинг голограмма, ноёб меъморий ечим, 45 тонна вазнга эга қандил ва пушти мармар тошларнинг уйғунлиги бу маконга ўзига хос улуғворлик бағишлагани алоҳида қайд этилди.
Манфред Хутерер, Германиянинг Ўзбекистондаги фавқулодда ва мухтор элчиси:
— Бу менинг Марказга биринчи ташрифим ва у менда жуда катта таассурот қолдирди. Менимча, Президент Шавкат Мирзиёев ташаббуси билан бунёд этилган ушбу марказ ҳақиқатан ҳам жаҳон миқёсидаги буюк лойиҳадир.
Бу ерда сиз ўз илдизларингизни — ислом цивилизацияси ва ўзбек цивилизацияси илдизларини намоён этяпсиз. Марказда жуда кўп ноёб хазиналар жамланган бўлиб, уларнинг айримлари ҳатто чет давлатлардан қайтариб олиб келинган.
Менимча, бу Марказ нафақат тарих ҳақида, балки келажак ҳақида ҳамдир. Биринчи, Иккинчи ва Учинчи Ренессанс ғоялари орқали инсон капитали, таълим ва маърифатнинг аҳамияти алоҳида таъкидланган.
Шунингдек, бу ерда тинчлик ғоялари илгари сурилган. Ислом — тинчликпарвар дин экани яна бир бор намоён бўлади. Ўзбекистоннинг қўшни давлатлар билан ҳамкорлик сиёсати ҳам жуда таъсирли намунадир.
Ишончим комилки, бу марказ Ўзбекистон ва бутун Марказий Осиё халқлари учун муҳим аҳамият касб этади. Шу билан бирга, хорижий меҳмонлар, сиёсатчилар ва делегациялар учун ҳам муҳим масканга айланади. Яқин ойларда Германиядан келадиган делегацияларни албатта шу ерга олиб келамиз.
Тошкентга келган ҳар бир инсон бу марказни албатта зиёрат қилиши керак. Бу ерга ташриф буюриш мен учун катта совға бўлди.
