Бизнесменларга имтиёзлар

Бизнесменларга имтиёзлар 

      Тошкентдан корхонасини Сирдарё вилоятига кўчирмоқчи бўлган тадбиркорларга турли имтиёзлар берилади. Бу ҳақда президент Шавкат Мирзиёев иштирокида ўтказилган Халқ депутатлари Сирдарё вилояти кенгашининг навбатдан ташқари сессиясида маълум қилинди.

      Қайд этилишича, саноат корхоналари босқичма-босқич пойтахтдан ташқарига кўчирилмоқда. Уларнинг кўпчилиги меҳнат ресурси, инфратузилмаси бор, ер-мулк солиғи арзонроқ бўлган жойларни излайди.

      Бунда Сирдарё эркин иқтисодий зонасида бўш турган ерларда Тошкентдаги мавжуд қувватларни жойлаштириш учун жуда катта имконият борлиги таъкидланди.

       Шундан келиб чиқиб, пойтахтдаги корхонасини Сирдарёга кўчирмоқчи бўлган тадбиркорлар учун саноат зонасидаги ерлар соддалаштирилган тартибда, чегирма билан таклиф этилади. Уларга 10 миллиард сўмгача имтиёзли кредит ҳам ажратилади ва хом ашёни темир йўли орқали ташишда арзонлаштирилган тарифлар қўлланади.

       Бундан ташқари, вилоятда фаолият юритаётган 1 минг 140 та саноат корхонасидан 129 таси паст қувватда ишлаётгани кўрсатиб ўтилди. Улар бутловчи ва эҳтиёт қисмни асосан четдан ёки республиканинг бошқа ҳудудидан олиб келаётгани учун таннарх бўйича рақобатлаша олмаяпти.

      Ушбу маҳсулотлар ҳудуднинг ўзида ишлаб чиқарилиб, кооперация йўлга қўйилса, таннархни бемалол 10 фоизгача камайтириш мумкинлиги қайд этилди.