Аҳоли мурожаатлари билан ишлашда камчиликка йўл қўйган 151 нафар мансабдор лавозимидан олинди
Аҳоли мурожаатлари билан ишлашда камчиликка йўл қўйган 151 нафар мансабдор лавозимидан олинди
Ўзбекистонда 2026 йил январь-август ойларида 151 нафар давлат ходими аҳоли мурожаатларини ҳал қилиб бермагани сабаб лавозимидан бўшатилди. Бу ҳақда Президент Халқ қабулхоналари матбуот хизмати маълумот берди.
Таҳлил қилинишича, саккиз ойда мурожаатлар билан ишлашда камчиликка йўл қўйган ходимларига чора кўриш бўйича давлат ташкилотларига 5 минг 486 та ҳужжат киритилган. Натижада белгиланган вазифасини етарлича бажара олмаган 151 нафар шахс лавозимидан озод этилган. Яна 833 нафар ходимга ҳайфсан жазоси қўлланган.
Ўз навбатида фаолиятидаги камчиликлар сабаб 89 киши жаримаган тортилган, саккиз кишининг лавозими пасайтирилган. Бандлик, маҳалла, МИБ, соғлиқни сақлаш, прокуратура, ижтимоий ҳимоя ва энергетика соҳаларида энг кўп камчиликларга йўл қўйилган.
Президент Халқ қабулхоналари мурожаатлар асосида чора кўришдан ташқари, йўл қўйилган хато ва камчиликларни тузатиш ишларини ҳам олиб борганини билдирган. Хусусан, энг кўп мурожаат тушаётган 10 тага яқин ташкилотларда амалий ўқув семинарлари ташкил этилгани хабар қилинган.
Аввалроқ Президент Халқ қабулхонаси раҳбари Фаррух Омонов энг кўп мурожаатлар болалар нафақасига оид бўлаётганини айтганди. 2026 йилинг 13-августигача қабулхоналарга аҳолидан 557 254 та мурожаат келиб тушган.
