2034 йилда одамлар ҳафтасига икки кун ишлайди

2034 йилда одамлар ҳафтасига икки кун ишлайди

Microsoft компанияси асосчиси Билл Гейтс яқин 10 йил ичида меҳнат бозорида кескин ўзгаришлар бўлишини айтди. Унинг тахминича, 2034 йилга бориб одамлар ҳафтасига атиги икки кун ишлайди.

Гейтснинг сўзларига кўра, келажакда сунъий интеллект ва нейрон тармоқлар кўпчилик касбларни бошқаради. Инсонларнинг кундалик мажбуриятлари камайиб, кўп ҳолларда тўлиқ иш ҳафтасига эҳтиёж қолмайди. “АИ жараёнларни тезлаштиради, аниқликни оширади ва кўп соҳаларда инсон меҳнатини тўлдиради,” — дейди у.

Билл Гейтс сунъий интеллект ёрдамида тиббиёт соҳасидаги муаммолар, хусусан, шифокор ва психологлар етишмовчилиги ҳал қилиниши мумкинлигини таъкидлаган. Шунингдек, у бу технологиялар инсониятга ижод, таълим ва шахсий ҳаёт учун кўпроқ вақт ажратиш имконини беришини қайд этган.

“Технологик тараққиёт одамларни ишсиз эмас, балки эркинроқ қилади. Иш жараёнлари автоматлаштирилгани сари, инсонлар ўз қизиқишлари ва ижодий ғоялари билан шуғулланиш учун кўпроқ вақт топади,” — деган Гейтс.

Шунингдек, у келажакда офисга қатнаш зарурати камайишини, масофадан туриб ишлаш одатий ҳолга айланишини айтган. Бу эса инсонларнинг ҳаёт сифати ва фаровонлигини оширишга хизмат қилади.

Таҳлилчиларга кўра, Гейтснинг бу фикрлари сунъий интеллектнинг жадал ривожланаётганини ва меҳнат муносабатларини бутунлай ўзгартириши мумкинлигини яна бир бор кўрсатмоқда.