Замонавий ўқув мажмуаси ёшлар ихтиёрида

Замонавий ўқув мажмуаси ёшлар ихтиёрида

Бухоро давлат университетида янги ўқув йилининг илк куни оддий дарс қўнғироғи билан эмас, балки таълим, илм-фан ва ёшлар келажаги учун янги имкониятлар эшиги очилиши билан бошланди. 2700 ўринли замонавий ўқув биносининг фойдаланишга топширилиши университет ҳаётидаги навбатдаги бунёдкорлик воқеаси бўлиш билан бирга, Бухорода замонавий илм-маърифат муҳитини шакллантириш йўлидаги муҳим қадам бўлди.

Фойдаланишга топширилган мажмуа университетнинг ўз маблағлари ҳисобидан 86,5 миллиард сўм йўналтирилиши натижасида барпо этилди.

Мажмуа таркибидан 2700 ўринли замонавий ўқув биноси, Қуёш физикаси илмий-тадқиқот лабораторияси, Ахборот-ресурс маркази ҳамда 400 ўринли талабалар турар жойи ўрин олган.

Янги бино шунчаки яна бир иншоот эмас. У — замонавий билим, инновацион ғоя ва илмий изланишлар уйғунлашадиган янги таълим макони.

30,2 гектар майдонда Бухоро давлат университетининг янги замонавий кампуси барпо этилмоқда. Мазкур кампус таркибида 20 минг ўринли ўқув бинолари ҳамда 5400 ўринли талабалар турар жойлари қурилиши режалаштирилган. Бу — оддий қурилиш лойиҳаси эмас. Бу лойиҳа орқали Бухорода таълим ва илм-фаннинг янги авлоди учун улкан интеллектуал макон яратилади. Замонавий лабораториялар, илғор таълим технологиялари, илмий-тадқиқот муҳити ва талабалар учун қулай инфратузилма бир нуқтада мужассамлашади.

Натижада Бухоро давлат университетининг таълим ва илм-фан салоҳияти янада кенгаяди, унинг мамлакатимиздаги нуфузи мустаҳкамланади. Энг муҳими, Бухоро нафақат ўзининг қадимий маданий ва маънавий мероси, балки замонавий таълим ва илм-фан маркази сифатида ҳам янги қиёфа касб этади.