Риштон халқаро кулолчилик маркази – ҳунармандларнинг минг йиллик орзуси

Риштон халқаро кулолчилик маркази – ҳунармандларнинг минг йиллик орзуси

Риштон кулолчилиги минг йиллик тарихга эга. Авлоддан-авлодга ўтиб келаётган бу ҳунарни 12 ёшимдан ўрганишни бошлаганман.

Битта кулол 10-12 йилда уста бўлиб етишади. Айтайлик, 20 ёшида кулолчилик сир-асрорларини ўрганишга киришган шогирд 30 ёшида ҳақиқий уста даражасига эришади.

Биз – риштонлик кулоллар яқингача уй шароитида фаолият юритиб келаётган эдик. Давлатимиз раҳбари ташаббуси билан барча қулайликларга эга Риштон халқаро кулолчилик марказининг ташкил этилиши нафақат бизларни бир жойга жамлади, балки анъанавий кулолчилик сир-асрорларини ўрганиш, йўқолиб кетган турларини тиклаш, ўзаро тажриба алмашиш, бир сўз билан айтганда, Риштон анъанавий кулолчилиги ривожига хизмат қилмоқда.

Айни пайтда ушбу марказда 20 нафар кулолчилик шажараси вакиллари фаолият юритмоқда. Ҳар бир устанинг ўз касб сирлари бор, албатта. Риштон кулолчилигининг ўзига хослиги – бу маҳаллий ўтлар, қирқ бўғиндан сир тайёрлашдир. Бунда кимёвий воситалар йўқ, шунинг учун сири тоза.

140 дан ортиқ шогирдларим бор. “Темир дафтар”га киритилган ва кам таъминланган оилаларнинг фарзандларига ҳам касб-ҳунар ўргатяпмиз. Улар ҳунарни ўрганганидан сўнг, мустақил фаолият олиб боради, ўз даромадига эга бўлади.

Хорижий давлатларда маҳсулотларимизга талаб катта. Мажмуанинг қурилиши эса экспорт салоҳиятимизни оширди. Ҳозирда Россиянинг Москва шаҳрида, шунингдек, Франция ва Австрияда дўконларимиз бор, шу орқали маҳсулотларимизни сотамиз.

Риштон кулолчилик йўналишида анъанани сақлаган ҳолда ишлаб чиқарган маҳсулотларимиз музейлар, галереяларда сақланади. Кулолчилик бўйича заводлар бор, аммо мазкур мажмуа анъанавий кулолчиликни сақлаб қолишга хизмат қилиши билан аҳамиятлидир. Эътиборли жиҳати, бу миллий ҳунармандчилигимизни таништириш ва тарғиб этишда ўрни катта. Сайёҳлар бу ерда кулолларнинг ҳаёти ва иш жараёни билан танишади, маҳсулотларни сотиб олиши мумкин.

Хорижий давлатларда сафарда кўп бўлганман. Яқинда Японияга бордим ва шу баҳона япон тилини ҳам ўргандим. Бу кунчиқар юрт билан мустаҳкам ҳамкорлик йўлга қўйилган. Европа давлатларининг эски услубимизга қизиқиши жуда юқори.

Марказ риштонлик кулолларнинг минг йиллик орзуси эди. Мажмуа қурилиши давлатимизнинг ҳунармандларга катта эътибори самараси, дейиш мумкин. Биз бу анъаналарни давом эттириб, кўпроқ ёшларни ҳунарга ўргатишимиз керак. Миллий ҳунармандчилик брендини жаҳонга танита олсак, асосий ютуғимиз бўлади.

Қўл меҳнати бўлган маҳсулотларимизнинг нархи масаласига кўпчилик қизиқиши табиий. 36 диаметрли товоқларимиз бир миллион сўмгача сотилади.

Давлатимиз раҳбари куни кеча мажмуамизга ташриф буюриб, кулоллар билан мулоқот қилди. Бу бизларга янада куч-қувват бағишлади, тарихимизга, халқ амалий санъатига юксак баҳо бўлди. Бу, ўз навбатида, ҳунармандларга масъулият юклайди. Биз бу ишончни, албатта, оқлаймиз.

Алишер Назиров,

Ўзбекистон халқ устаси.

ЎзА