Президент кинематография соҳаси вакиллари билан учрашди

Президент кинематография соҳаси вакиллари билан учрашди

Президент Шавкат Мирзиёев 26 октябрь куни “Ўзбекфильм” киностудиясига ташриф буюриб, кинематография соҳаси вакиллари билан учрашди. 

Бундан бир неча йил олдин давлатимиз раҳбари ташаббуси билан “Тирик тарих” ижодий лойиҳасига старт берилган эди. Мана шу қисқа вақт ичида қарийб элликта фильм устида иш бошланди. Уларнинг ўн тўққизтаси суратга олиниб, аллақачон томошабинларга тақдим этилди, ҳатто нуфузли халқаро кинофестивалларда совринли ўринларни қўлга киритишга ҳам улгурди.

Бундан ташқари, Марказий Осиё давлатлари – Қозоғистон, Қирғизистон, Тожикистон ва Туркманистон билан алоқаларимиз кенгайгани кино санъати ривожига ҳам кучли туртки берди. Хусусан, туркманистонлик ҳамкасбларимиз билан ҳамкорликда “Махтумқули”, тожик киноижодкорлари билан биргаликда эса “Навоий ва Жомий” бадиий фильмлари яратилди. Ўзимиз “Баҳодир Ялангтўш” тарихий фильмини суратга олдик. Қолаверса, Россия, Беларусь ва Туркия каби давлатларнинг кино усталари билан тажриба алмашиб, турли мавзуларда қўшма лойиҳаларни амалга оширяпмиз ва бунинг самараси яхши бўлмоқда.

Болалар контентини ривожлантириш борасидаги қадамларимиз ҳам юқори натижа бермоқда. Қисқа муддатда ўн бешга яқин болалар фильмини ишлаб чиқариш бошланиб, уларнинг илк намуналари экранларга чиқди. Фарзандларимизни ёшлигиданоқ кино кўриш маданиятига ўргатиб, уларни санъатга ошуфта руҳда тарбияласак, маънан бой ва мазмунли умр кечиради. Бу эса танлаган йўлимиз нақадар тўғри эканидан далолатдир.