“Наврўз” этнографик боғида "Кулоллар сайли"

“Наврўз” этнографик боғида "Кулоллар сайли"

Пойтахтимиздаги “Наврўз” этнографик боғида "Кулоллар сайли" миллий кулолчилик маҳсулотлари кўргазмаси ўз ишини бошлади.

Президентимизнинг жорий йил 23 мартдаги “Кулолчиликни жадал ривожлантириш ва қўллаб-қувватлаш чора-тадбирлари тўғрисида”ги қарорига мувофиқ, жорий йилнинг 10-11 апрель кунлари "Кулоллар сайли" миллий кулолчилик маҳсулотлари кўргазмаси ва аукцион савдоси хайрия тадбири ташкил этилиши режалаштирилган эди.

Ўзбекистон Республикаси "Ҳунарманд" уюшмаси, Савдо-саноат палатаси томонидан ташкил этилган тадбирда Жаҳон Ҳунармандлар Кенгаши – Осиё ва Тинч Океани минтақаси раиси, Ўзбекистон Савдо-саноат палатаси раиси Адҳам Икрамов ва "Ҳунарманд" уюшмаси раиси Улуғбек Абдуллаев иштирок этиб, мамлакатимизда ҳунармандчиликнинг асосий йўналишларидан бири бўлган кулолчилик санъатига қаратилаётган эътибор, бу бебаҳо санъат асарлари дунё бозорларида юқори баҳоланаётгани ҳақида сўз юритди.

- Оилавий ҳунармандчилик билан шуғулланамиз. Бу ҳунарни бобомдан ўрганганман, бобом эса бобосидан. Бугунги кунда кулолчиликнинг янги йўналишларидан бири бўлган ландшафт-дизайн билан шуғулланиб келяпман. Бу йўналишда уйлар, ташкилот ҳовлилари, хоналарни жиҳозлашда кенг фойдаланилмоқда. Ҳозирда ўнлаб шогирдларга бу ҳунарнинг сирларини ўргатиб келаяпман, - дейди андижонлик тўртинчи авлод ҳунарманд Азизбек Исроилов.

Тадбирда юртимизнинг 16 та туман ва шаҳрида бугунги кунда 20 та кулолчилик марказини ташкил қилиш, “Темир дафтар”, “Аёллар дафтари” ҳамда “Ёшлар дафтари”га киритилган янги турмуш қураётган 100 минг нафар хотин-қизларга режа бўйича “Обод ва хавфсиз маҳалла” жамғармаси ҳисобидан кулолчилик маҳсулотлари тўпламини совға қилиш тизими, ҳунармандчилик марказлари, йирик савдо мажмуалари, туристик маршрутга киритилган объектлар ва бозорларда кулолчилик маҳсулотлари савдосини ташкил қилиш, миллий кулолчилик маҳсулотларини ташқи бозорларда кенг тарғиб этиш ва савдосини ошириш, кулолларга шогирдларни тайёрлаш, зарур хомашёларни сотиб олиш ва шогирдларни иш ҳақи билан таъминлаш учун Бандликка кўмаклашиш давлат жамғармаси маблағлари ҳисобидан субсидиялар ажратиш каби муҳим йўналишлар борасида амалга оширилаётган ишлар ва галдаги режалар ҳақида маълумот берилди.

"Ҳунарманд" уюшмаси томонидан 2020 йилда уста-ҳунармандларни жалб қилган ҳолда кулолчилик йўналишида 256 та ўқув курслари ташкил этилиб, мингдан ортиқ шогирдлар касб-ҳунарга ўргатилди. Оилавий тадбиркорликни ривожлантириш дастурлари доирасида 2018-2020 йилларда 32,6 миллиард сўмлик 1 минг 126 та кулолчилик лойиҳаси амалга оширилди. Кулолчилик йўналишида банд бўлган усталар 1 минг 582 нафарга ҳамда шогирдлар 4 минг 902 нафарга етди.