Марказий Осиё – умумий инвестиция макони

Марказий Осиё – умумий инвестиция макони

     Дунё сиёсий турбулентлик даврига кирди – янги ўйин қоидалари жорий бўлмоқда, эртанги кунни прогноз қилиш қийинлашмоқда. Бундай вазиятда Марказий Осиё интеграцияси алоҳида аҳамият касб этади – “бўлинганни бўри ейди”. Бу йўлда қўйиладиган кейинги қадам – умумий инвестиция маконини яратишlдир.

    Глобал иқтисодиётда регионализм тобора кучаймоқда. Савдо урушлари, геоиқтисодий фрагментация, таъминот занжирларининг қайта конфигурацияси шароитида минтақавий блоклар инвесторлар учун барқарор ва прогноз қилинадиган майдон яратишга интилмоқда.

     Марказий Осиё давлатлари ҳам ушбу жараёндан четда қолмаслиги керак. Минтақавий интеграциянинг навбатдаги босқичи сифатида минтақа давлатлари учун Умумий инвестиция маконини барпо этиш долзарб стратегик вазифага айланиши лозим.

     Бугунги кунда Марказий Осиё аҳолиси қарийб 80 миллиондан ошди. Агар унга Озарбойжон аҳолиси ҳам қўшилса, бу рақам салкам 100 миллионга тенг келади. Бу энди кичик ва фрагментациялашган бозор эмас. Албатта, у Европа Иттифоқи ёки ASEAN миқёсидаги бозор билан тенглашмайди, бироқ минтақа ичида “миллий чемпионлар”ни етиштириш, саноат кластерларини шакллантириш ва капитал ҳаракатланишини тезлаштириш учун етарли ҳажмни таъминлай олади.

      Бозорнинг кенглиги тадбиркорлик ҳаракатчанлигини тезлаштиради. Ички бозорни тўйинтирган бизнес табиий равишда қўшни мамлакатларга чиқишни бошлайди. Бу жараён аллақачон кузатилмоқда: ишлаб чиқариш ва хизмат кўрсатиш соҳасидаги компанияларимиз Қозоғистон, Қирғизистон, Тожикистон ва ҳатто Афғонистон бозорларига кириб бормоқда. Шу билан бирга, қўшни давлатлардан ҳам инвестиция оқими шаклланмоқда. Масалан, Қозоғистон капитали иштирокидаги молиявий институтларнинг фаолияти бунга мисол бўла олади.