Қишлоқ хўжалиги ходимлари меҳнатининг муносиб эътирофи
Қишлоқ хўжалиги ходимлари меҳнатининг муносиб эътирофи
Ўзбекистон тарихида илк бор пахта ҳосили 5 миллион тоннадан ошди. Ўзбекистон Республикаси Президенти Шавкат Мирзиёевнинг деҳқон ва фермерларга, соҳанинг барча ходимларига йўллаган табригида ушбу ютуқнинг тарихий аҳамияти алоҳида эътироф этилди.
Бу нафақат қишлоқ хўжалиги, балки бутун мамлакатимиз учун жуда муҳим воқеадир. Янги Ўзбекистон тарихида илк бор бундай улкан хирмон кўтарилди. Ушбу натижа ортида миллионлаб инсонларнинг фидокорона меҳнати ҳамда соҳада амалга оширилаётган ислоҳотларнинг юқори самарадорлиги мужассам.
5 миллион тонналик пахта ҳосили йиғилгани экстенсив моделдан билим, инновация ва юқори меҳнат унумдорлигига асосланган интенсив ривожланишга ўтилганининг амалий натижаси бўлди. Келтирилган маълумотлар ислоҳотларнинг кўламини яққол кўрсатиб турибди. Сўнгги йилларда ғўза майдонлари 38 фоизга қисқаргани ҳолда, ўртача ҳосилдорлик 2,7 бараварга — гектаридан 21 центнердан 56 центнергача ошди.
