Ислом молияси бўйича Ўзбекистон ва Малайзия ҳамкорлиги

Ислом молияси бўйича Ўзбекистон ва Малайзия ҳамкорлиги

sregsrthysrhysaryataewraqwreaqwr.jpg

Ўзбекистон элчиси Равшан Усманов «Amanie Group» ислом молиялаштириши бўйича консалтинг компанияси асосчиси ва Малайзия халқаро ислом университети президенти Моҳд Дауд Бакар билан музокаралар ўтказди.

 

Музокаралар доирасида «Amanie Group» компаниясини Ўзбекистонда ислом молиялаштирилиши тамойилларини амалга оширишга жалб қилиш, жумладан, зарур ҳуқуқий асосни яратиш, шунингдек, IIUM билан биргаликда ушбу соҳада ўзбек мутахассисларини тайёрлашни ташкил этиш масалалари муҳокама қилинди.

 

2000 йилда ташкил этилган «Amanie Group» компанияси тегишли норматив-ҳуқуқий базани ривожлантириш, шу жумладан, ислом молиялаштириши воситаларини амалга ошириш бўйича тажрибага эга. Бу йўналишда Қозоғистон ва Афғонистонда ишлар амалга оширилди. «Amanie Group» Бирлашган Араб Амирликлари, Буюк Британия ва Қозоғистонда ўз ваколатхоналарига эга.

 

IIUM ислом банкинги соҳасида мутахассислар тайёрлаш бўйича етакчи университет ҳисобланади. У 1983 йилда Малайзия ҳукумати томонидан ташкил этилган ва Селангор штатида жойлашган. Университетда таҳсил олаётган талабаларнинг умумий сони 117 мамлакатдан 26 минг талабани ташкил этади. Университет Малайзия бўйлаб 6 та филиалларига эга. Университетда 13 факультетлардаги бакалаврлик, магистратура ва докторантура дастурларини ўз ичига олувчи ўқитишнинг тўлиқ цикли амалга оширилади.

 

IIUM курслари инглиз ва араб тилларида ўқитилади. IIUM ислом ҳуқуқи соҳасида кенг кутубхонага эга. Умумий коллекция 550 минг монография, 1,6 минг босма нашр, 60 минг аудиовизуал материаллардан иборат.

 

Музокаралар натижасида мамлакатимизда ислом банкинги воситаларини жорий этиш соҳасида Ўзбекистон Марказий банки ва «Amanie Group» компанияси ўртасида шериклик муносабатларини ўрнатиш бўйича келишувга эришилди.

 

“Дунё”ахборот агентлиги