Франция Миллий кутубхонаси билан ҳамкорлик

Франция Миллий кутубхонаси билан ҳамкорлик

krpckeryukrpyukpyupyukryrcupavau.jpg

Мамлакатимизнинг Париждаги элчихонаси ташаббуси билан Имом Мотуридий халқаро илмий-тадқиқот маркази ва Франция Миллий кутубхонаси Шарқ қўлёзмалари департаменти ўртасида видеоанжуманалоқа шаклида мулоқот ташкил этилди.

 

Унда Ўзбекистон томонидан Марказ раҳбарияти, француз томонидан эса Шарқ қўлёзмалари департаменти раҳбари Лорен Эрише бошчилигида француз шарқшунос олимлари қатнашди.

 

Онлайн-анжуманда Имом Мотуридий халқаро илмий-тадқиқот марказининг мақсад ва вазифалари таништирилди. Исломий илмлар, хусусан, калом илми тарихи ва унинг бугунги кундаги аҳамиятини тадқиқ этиш соҳасидаги халқаро ҳамкорликни кучайтириш, амалга оширилган тадқиқотлар натижалари бўйича қомуслар, каталоглар ва китоблар нашр этиш устида ишлар олиб борилаёгани айтиб ўтилди.

 

Француз илмий жамоатчилиги вакиллари Ўзбекистонда диний-маърифий соҳадаги тизимли ислоҳотларни юқори баҳолаб, бугунги кунда чет давлатларнинг Ўзбекистон илмий муассасалари билан ҳамкорлик қилишга бўлган қизиқиши кун сайин ортиб бораётганини таъкидлади.

 

Хусусан, Л.Эрише Марказ билан илмий алоқалар ўрнатишга тайёрлигини баён этди. Ўзбекистон маданий меъроси жаҳон тўпламларида китоб-альбомлари тўпламининг кутубхонага тақдим этилгани, Кутубхонада сақланаётган қўлёзмалар асосида тайёрланган “Мовароуннаҳр қўлёзмалари Франция тўпламларида” китобининг нашр этилганини таъкидлади ўтди.

ykervkeroyvoyukpyumyumyukpp.jpg

Бундан ташқари, Элчихонада ташкил этилган Ўзбекистонда диний бағрикенглик ва миллатлараро тотувлик, мамлакатимиз маданий меъросига бағишланган анжуманларда тақдимотлар ўтказганини билдириб, Марказ билан ҳамкорлик икки томон учун янги йўналиш экани, француз тадқиқотчиларида мазкур муносабатларга қизиқиш юқори даражада эканини эътироф этди.

 

Қўлёзмалар бўйича мутахасис Х.Ш-Алами ислом динининг софлиги ва бағрикенглик тамойилларини баён этишда Имом Мотуридий илмий-маърифий мероси муҳим аҳамиятга эгадир, деб таъкидлади.

 

Тадбир якунида томонлар биргаликда чора-тадбирлар режасини ишлаб чиқиш, Имом Мотуридий ҳаёти ва ижодига доир қўлёзмаларни тадқиқ қилиш, Франциянинг “Gallica” электрон кутубхона тизими ва каталоглаштириш бўйича тажрибасини ўрганиш ва бошқа масалалар юзасидан келишувларга эришилди.

 

Маълумот учун, Кутубхона ҳозирги номда 1995 йилда ташкил этилган, бироқ турли манбаларга қараганда, унинг ташкил этилиш тарихи 1368 йилга бориб тақалади. Унда сақланаётган коллекциялар сони тахминан 40 миллион донани ташкил қилади ва дунёдаги энг йирик мажмуалардан бири ҳисобланади.

“Дунё” АА