Бухоро зардўзлиги

Бухоро зардўзлиги

Бухорода азалдан ҳунармандчиликнинг каштадўзлик, кулолчилик, темирчилик, мисгарлик, зардўзлик, заргарлик каби турлари ривожланган. Айниқса, Бухоро зардўзлиги нафақат юртимизда, балки хорижда ҳам маълуму машҳур.

Бухоро зардўзлик мактабининг уста-ҳунармандлари томонидан бетакрор услублар асосида кашф этилган нақшу нигорлар матода зар ип билан мавжланиб туради. 

Зардўзлик дастгоҳи, бухороча айтганда корчўпда таранг тортилган бўз устига бахмал мато керакли ўлчамда ётқизилади. Қалин қоғозда кесилган гул бахмалга бириктирилиб, зар иплар игна ёрдамида матога туширилади. Бунда ҳунарманддан улкан маҳорат ва қунт талаб этилади. 

Усталар томонидан тайёрланган зардўзлик асарларида зардўзи, заминдўзи, гулдўзи ҳамда ислимий нақшлардан тагалак, бодом гуллари ўзгача кўринишга эга. Зардўзлик буюмларидан эса асосан, зар чопон, сўзана, аёллар либослари, маросим оёқ кийимлари, елпиғич ва чойнак ёпинчиғига талаб юқори.