15 декабрь - Бутунжаҳон туркий тиллар куни

15 декабрь -  Бутунжаҳон туркий тиллар куни

       Кўҳна Самарқандда тарихий воқеа бўлиб ўтди: Туркий маданият ва мерос жамғармаси томонидан ташкил этилган тантанали тадбирда  ЮНЕСКО 15 декабрни  Бутунжаҳон туркий тиллар куни деб эълон қилиш ҳақида қарор қабул қилгани маълум қилинди.

       Ушбу қарор Самарқандда бўлиб ўтаётган  ЮНЕСКО Бош конференциясининг 43-сессиясида бир  овоздан маъқулланди. Мазкур ташаббус  Ўзбекистон, Туркия, Озарбайжон, Қозоғистон ва Қирғизистон томонидан ҳамда ЮНЕСКО га аъзо 26 та давлат кўмагида илгари сурилди.

      Бу сананинг танланиши бежиз эмас ва чуқур  тарихий аҳамиятга эга. 1893 йил 15 декабрда даниялик олим Вильгельм Томсен туркий тилларнинг  кўп асрлик тарихини тасдиқловчи  қадимий ёзма  манбалардан бири - Ўрхун битиклари алифбосини  ўқишга муваффақ бўлганини эълон қилди.

       Ушбу қарорда туркий тиллар қарийб 12 миллион  квадрат километр майдонда истиқомат қилувчи 200 миллиондан ортиқ кишининг  она тили эканлиги  қайд этилади.

       Бутун жаҳон туркий тиллар кунининг эълон қилиниши тил ва маданий хилма-хилликни мустаҳкамлаш,  маданиятлараро  мулоқотни ривожлантириш ва  туркий халқларнинг оғзаки  меросини сақлаб қолишга  қаратилган.