Тошкент – водий йўлининг бир қисмида максимал тезлик пасайтирилди

Тошкент – водий йўлининг бир қисмида максимал тезлик пасайтирилди

Тошкент вилояти кенгаши Тошкент-Андижон йўлининг Оҳангарон тумани ҳудудидан ўтувчи 103−131-километрлари оралиғида тезлик чекловларини пасайтиришни маъқуллади. Енгил автомобиллар учун максимал тезлик 80 км/соат, оғир юк машиналари учун эса 50 км/соат этиб белгиланади.

Тошкент вилояти ҳудудидан ўтувчи А-373 «Тошкент-Оҳангарон-Ангрен-Қўқон-Шаҳрихон-Андижон» халқаро аҳамиятга эга автомобиль йўлининг айрим қисмларида рухсат этилган ҳаракат тезлиги пасайтирилади. Бу Халқ депутатлари Тошкент вилояти кенгашининг 8 июндаги қарорида белгиланган.

Ҳужжатга мувофиқ, M1, M2 ва N1 тоифасидаги транспорт воситалари, яъни енгил автомобиллар, 8 нафардан кўп бўлмаган йўловчига мўлжалланган микроавтобуслар ҳамда оғирлиги 3,5 тоннагача бўлган юк автомобиллари учун максимал тезлик соатига 80 километр этиб белгиланади. N2 ва N3 тоифасидаги, яъни оғирлиги 3,5 тоннадан юқори бўлган юк автомобиллари, жумладан, йирик юк машиналари учун эса тезлик чеклови соатига 50 километрга туширилади.

Қарор иловасида келтирилишича, ҳозир мазкур участкаларда рухсат этилган тезлик соатига 100 километрни ташкил этади. Янги тартиб 103–104, 105–106, 108–109 ва 109–131-километрлар оралиғидаги қисмларга татбиқ этилади.

Ҳужжатда қайд этилишича, тезликни пасайтириш ташаббуси Йўл ҳаракати хавфсизлигини таъминлаш бўйича ҳудудий махсус комиссия таклифи асосида ишлаб чиқилган. Лойиҳа жамоатчилик муҳокамаси учун regulation.gov.uz порталига жойлаштирилган ва муҳокама муддати 27 май куни якунланган.