«Табаррук зиёрат» лойиҳасини амалга ошириш бўйича маслаҳатлашув

«Табаррук зиёрат» лойиҳасини амалга ошириш бўйича маслаҳатлашув

Ўзбекистон Туризм ва спорт вазирлиги Туркий тилли давлатлар ҳамкорлик кенгаши котибияти билан видеоконференция форматида маслаҳатлашувлар ўтказди.

.

 Туркий тилли давлатлар ҳамкорлик кенгаши  котибиятининг хабар беришича, учрашувда Туризм ва спорт вазирининг биринчи ўринбосари Улуғбек Аъзамов, Туркий Кенгаш Бош котибининг ўринбосари Мирвоҳид Азимов ва бошқалар иштирок этди.

 Тадбирда Президент Шавкат Мирзиёевнинг 31 март куни бўлиб ўтган Туркий Кенгашнинг норасмий онлайн-саммитида билдирган туризм соҳасидаги ҳамкорликни ривожлантириш бўйича ташаббусларини амалий амалга ошириш масалалари муҳокама қилинди. Хусусан, аъзо давлатлар ҳудудларида жойлашган муқаддас қадамжоларни зиёрат қилишни ташкил этишга қаратилган «Табаррук зиёрат» лойиҳасини амалга ошириш бўйича кейинги қадамлар белгилаб олинди.

 Томонлар жорий йилда Туркий кенгаш туризм вазирларининг олтинчи учрашувини Ўзбекистонда ўтказиш бўйича ташкилий масалаларни кўриб чиқди.

 Учрашув иштирокчилари, шунингдек, Туркий тилли давлатлар ҳамкорлик кенгаши котибияти  доирасидаги туризм соҳасидаги ўзаро алоқаларнинг долзарб масалалари, жумладан, «Замонавий ипак йўли» қўшма туризм лойиҳасини илгари суриш, туркий дунё сайёҳлик йўналишларининг рақамли харитасини яратиш ва Туризм таълими бўйича мувофиқлаштириш қўмитасини шакллантириш бўйича фикр алмашди.

«Дунё» АА