Самарқандга йилнинг биринчи ярмида 1 миллион сайёҳ келди

Самарқандга йилнинг биринчи ярмида 1 миллион сайёҳ келди

Пандемия сабабли ўтган йил Самарқандга келган сайёҳлар 633 минг нафарни ташкил этган эди. Бу йил эса карантин чекловларнинг юмшатилиши, бир қатор давлатлар фуқароларлари учун виза тартибларининг соддалаштирилиши, халқаро авиарейсларнинг тикланиши ҳамда юртимиз бўйлаб ички туризм фаол қўллаб-қувватланиши натижасида йилнинг биринчи ярмида Самарқандга 1 миллион 86 минг нафар сайёҳ келди. Уларнинг 54 минг нафардан ортиғини хорижлик туристлар ташкил этади.

Ушбу маълумотлар Самарқанд вилояти туризм ва спорт бошқармаси бошлиғи ўринбосари Дилшод Нарзиқулов иштирокида ўтказилган матбуот анжуманида айтилди.

– 2019 йилда вилоятимиздада фаолият юритаётган жойлаштириш воситалари сони 296 тани ташкил этган бўлса, бугунги келиб улар 412 тага етди, – деди Д.Нарзиқулов. – Бу меҳмонхона, оилавий меҳмон уйлари ҳамда санаторий ва соғломлаштириш масканларида бир вақтнинг ўзида 11 минг 500 нафардан ортиқ меҳмонни қабул қилиш мумкин.

 Вилоятдаги меҳмонхоналарнинг ўзи ҳозирда 171 тани, оилавий меҳмон уйлари эса 217 тани ташкил этмоқда. Сайёҳларга 136 та туристик синфга мансуб автобус, 126 та микроавтобус ва 20 та электромобиль, 181 та туроператорлар ҳамда 336 нафар гид-таржимон хизмат кўрсатмоқда. Соҳада 2021 йил 6 ойи давомида  84 та туристик лойиҳалар ишга туширилди. Жумладан, 12 та меҳмонхона фойдаланишга топширилди, 45 та оилавий меҳмон уйлари ташкил этилди.

Вилоятда сайёҳлар шаҳар ташқарисида бориши мумкин бўлган жойларни кўпайтириш ишлари олиб борилмоқда. Сайёҳлар учун шаҳар ташқарисида 15 та янги туристик маршрут йўлга қўйилди.

Айни пайтда реконструкция қилинаётган Самарқанд халқаро аэропортининг фаолият бошлаши билан вилоятда туризмни ривожлантириш имкониятлари анча кенгаяди. Ушбу ҳаво қўналғаси орқали куни 40 тагача рейсни амалга ошириш мумкин.

ЎзА