Ўзбекистондаги Ислом цивилизацияси марказига ташриф буюрган хорижий нуфузли меҳмонлар ўтмишдаги буюклик келажак тараққиётига кўприк бўлишига гувоҳ бўлишмоқда. 3000 йиллик тарихни ўзида мужассам этган Ўзбекистон Президенти Шавкат Мирзиёев муаллифлигидаги Марказга ташриф буюрган Индонезия Республикасининг Ўзбекистондаги фавқулодда ва мухтор элчиси Сити Руҳаини Жуҳаятин бошчилигидаги делегация ҳам буни ҳис қилишди.

Индонезия Республикасининг Ўзбекистондаги фавқулодда ва мухтор элчиси Сити Руҳаини Жуҳаятин бошчилигидаги делегация Ўзбекистондаги Ислом цивилизацияси марказига ташриф буюрди.

Ректорлар ва профессорлардан иборат делегация ташриф давомида Марказ экспозициялари, тарихий қўлёзмалар, ноёб артефактлар, миллий мато ва икат намуналари, шунингдек, Ўзбекистоннинг қадимги даврлардан бугунги кунгача бўлган тараққиётни акс эттирувчи экспозициялар билан яқиндан танишди.

Меҳмонларга Марказда Ўрта Осиё заминининг 3000 йиллик тарихий тараққиёти, Мовароуннаҳрда шаклланган илм-фан анъаналари, буюк алломалар мероси, ислом цивилизацияси ривожига қўшилган улкан ҳисса, Биринчи ва Иккинчи Ренессанс даврлари ҳамда Янги Ўзбекистоннинг замонавий тараққиёт йўли ҳақида маълумот берилди.

Индонезия элчиси Сити Руҳаини Жуҳаятин экспозициянинг “Исломдан аввалги цивилизациялар” бўлимида Чоч тарихига оид экспозициялар, металлургия жараёнларини акс эттирувчи интерактив қурилмалар билан танишди. Шунингдек, “Иккинчи Ренессанс” бўлимида интерактив аватарлар орқали Бибихоним сиймоси билан мулоқот қилиш имкониятини синаб кўрди.

Миллий матолар ва икат намуналари акс эттирилган экспозициялар ҳам меҳмонларда алоҳида таассурот қолдирди. Делегация аъзолари ушбу бўлимлар орқали ўзбек халқининг бой маданий мероси, амалий санъат анъаналари ва миллий эстетик қарашлари ўзига хос тарзда намоён этилганини таъкидлади.

Уларнинг фикрича, “Янги Ўзбекистон” бўлими Ўзбекистоннинг бугунги очиқ, фаол ва конструктив ташқи сиёсатини кенг ёритиб беради.

Ташриф давомида меҳмонлар Марказнинг қалби саналган Қуръони Карим залида ҳам бўлдилар. Бу ердаги ноёб қўлёзма мерос, залнинг маънавий муҳити ва экспозициянинг бадиий-меъморий ечими Индонезия делегациясида чуқур таассурот қолдирди.

Сити Руҳаини Жуҳаятиннинг таъкидлашича, Марказ Ўзбекистон Республикаси Президенти Шавкат Мирзиёевнинг ўтмишдаги буюк илмий-маърифий меросни келажак авлодлар билан боғлашга қаратилган ғояси билан ҳамоҳангдир.

Сити Руҳаини Жуҳаятин, Индонезиянинг Ўзбекистондаги фавқулодда ва мухтор элчиси:

— Бу марказ ўзининг миқёси, мазмуни ва ғояси билан кишида катта ҳайрат уйғотади. Шу билан бирга, у инсонни илҳомлантиради. Чунки ушбу муҳташам цивилизация маркази Ўзбекистоннинг тарихий йўлини — қадимги даврлардан то замонавий тараққиётгача бўлган жараённи изчил ва таъсирчан тарзда очиб беради. Биз бу ерда кўплаб буюк алломалар, муҳим илмий янгиликлар ва инновациялар ҳақида қимматли маълумотларга эга бўлдик. Бу Марказ Президент Шавкат Мирзиёевнинг Ўзбекистон буюк илмий-маърифий меросни келажак авлодлар билан боғлаш борасидаги қарашларини ифода этади. Ўтмишдаги буюклик келажак тараққиёти учун мустаҳкам кўприк бўлиши керак. Бу Ўзбекистон учун ҳам, умуман мусулмон олами учун ҳам чуқур мазмунга эга миссиядир.

Элчи, шунингдек, Ислом цивилизацияси маркази Мовароуннаҳр илмий меросини янада кенгроқ англашга хизмат қилишини қайд этди. Унинг фикрича, Индонезия фуқаролари, айниқса, ислом тарихи, Марказий Осиё мероси ва унинг жаҳон цивилизациясидаги ўрни билан қизиқувчилар учун ушбу Марказ муҳим маърифий манба бўла олади.

Индонезия делегацияси аъзоси, Сунан Калияга давлат ислом университети ректори, профессор Нур Ҳидоят Ҳасаннинг фикрича, Марказнинг муҳим жиҳати ҳар бир тарихий босқичнинг батафсил, тушунарли ва замонавий воситалар ёрдамида очиб берилган.

— Мен Ўзбекистон тарихий тараққиётининг узоқ даври — исломдан аввалги цивилизациялардан ўрта асрларга, Биринчи Ренессансдан Иккинчи Ренессансгача, ундан кейин эса замонавий Ўзбекистон ва унинг келажак тараққиётигача бўлган жараён изчил тақдим этилганидан жуда мамнун бўлдим. Бу ерда Ўзбекистон тарихи, айниқса, унинг ислом билан боғлиқ жиҳатлари давомийлик ва ўзгаришлар орқали жуда аниқ кўрсатилган. Интерактив ечимлар орқали ўтмишда кечган жараёнларни аниқ тасаввур қилиш мумкин. Шу боис бу Марказга нафақат ўзбекистонликлар, балки бутун мусулмон олами вакиллари, жумладан, индонезияликлар ҳам ташриф буюриши керак. Исломнинг тарихий ўтмиши, айниқса, Марказий Осиё мероси, унинг Яқин Шарқ ҳамда Жануби-Шарқий Осиё билан боғлиқ жиҳатларини ўрганишни истаганлар бу ерда жуда кўп маълумот олиши мумкин, — деди профессор.