Халқаро рейтинг экспертлари Ислом цивилизацияси маркази билан танишди

Халқаро рейтинг экспертлари Ислом цивилизацияси маркази билан танишди

Ўзбекистонга ташриф буюрган халқаро рейтинг ва молиявий таҳлил соҳаси вакиллари мамлакатнинг нафақат иқтисодий салоҳияти, балки бой тарихий, илмий ва маданий мероси билан ҳам яқиндан танишдилар. Хусусан, S&P Global халқаро рейтинг агентлиги ва Citi Global суверен рейтинг консалтинг гуруҳи вакиллари Ўзбекистондаги Ислом цивилизацияси марказига ташриф буюриб, унинг экспозициялари билан танишдилар.

Ташриф давомида меҳмонлар Марказнинг меъморий ечими, экспозиция заллари, ноёб қўлёзмалар ва артефактлар, буюк алломаларнинг илмий мероси, Ренессанс даврлари ҳамда Ўзбекистоннинг замонавий тараққиётига бағишланган экспозицияларни яқиндан кўрдилар.

Президент Шавкат Мирзиёев ташаббуси ва алоҳида эътибори билан барпо этилган Марказ бугун нафақат тарихий меросни намойиш этувчи маскан, балки ислом цивилизацияси тарихини ўрганиш, илмий тадқиқотлар олиб бориш, халқаро илмий мулоқотни ривожлантириш ва янги билимларни авлодларга етказишга хизмат қилувчи йирик илмий-маърифий мажмуа сифатида шаклланмоқда.

S&P Global халқаро рейтинг агентлигининг суверен кредит рейтинги гуруҳи директори ўринбосари, Ўзбекистон Республикасининг суверен кредит рейтинги бўйича бош таҳлилчи Жулия Филокка Марказдаги таассуротларини шундай ифодалади:

«Бу дунё бўйлаб кўрган энг гўзал музейларимдан бири бўлди. Мен кўп мамлакатларда бўлганман, кўп саёҳат қилганман. Аммо Ўзбекистоннинг бундай бой тарих ва маданиятга эга эканини тасаввур қилмаган эканман. Марказнинг ҳар бир қисмидаги деталлар, экспозицияларнинг безаги ва умумий муҳит жуда катта таассурот қолдирди.

Мен учун энг ноёб қисм — энг қадимий Қуръон намойиш этилган зал бўлди. У ердаги ёруғликлар намойиши билан уйғунлашган экспозиция ҳақиқатан ҳам ажойиб. Буни Ўзбекистонга келган ҳар бир инсонга тавсия қилган бўлардим. Ўзим ҳам бу ерга яна қайтишни истайман».

Citi Global суверен рейтинг консалтинг гуруҳи бошқарувчи директори ўринбосари Жерард Арабиан эса экспозицияларда тарих ва бугунги тараққиётнинг ўзаро боғлиқ ҳолда намоён этилганига эътибор қаратди:

«Бу жуда гўзал ва мазмунан бой маскан. Бу ерда Ислом тарихи ва унинг Ўзбекистон тарихи билан қандай уйғунлашгани ҳақида жуда кўп маълумот олдик. Энг муҳими, қадимги Ўзбекистондан бугунги Янги Ўзбекистонгача бўлган жараёнлар бир-бири билан боғлиқ ҳолда намоён этилган.

Марказни барпо этиш учун жуда катта меҳнат қилингани кўриниб турибди. Мен учун энг қизиқарли жиҳатлардан бири Ўзбекистоннинг замонавий тараққиётига бағишланган қисм бўлди. У ерда мамлакатнинг бугунги иқтисодий салоҳияти қандай шакллангани, эришилган натижалар ва замонавий Ўзбекистоннинг ривожланиш жараёнини кўриш мумкин. Бу жуда қизиқарли тажриба бўлди».

Халқаро рейтинг экспертларининг фикрлари Марказда тарих ва замонавий тараққиётнинг узвий боғлиқ ҳолда талқин этилишини яна бир бор кўрсатади. Бу ерда тарих ўтмиш ҳақидаги маълумотлар мажмуи сифатида эмас, бугунги воқеликни англаш ва келажак ҳақида фикр юритишга ундайдиган билим манбаи сифатида намоён бўлади.

Ўзбекистондаги Ислом цивилизацияси марказининг муҳим вазифаларидан бири — аждодларимизнинг илмий меросини чуқур ўрганиш, уни замонавий илмий ёндашувлар асосида тадқиқ этиш ҳамда Ўзбекистоннинг бой цивилизацион тажрибасини халқаро илмий ҳамжамиятга кенг намойиш этишдир.

Ўзбекистондаги Ислом цивилизацияси маркази — тарихни томоша қиладиган эмас, тарих орқали бугунни англайдиган ва келажак ҳақида фикр юритадиган макон.