Тарихни шунчаки намойиш этиш эмас, балки уни англаш, ўтмиш ва бугун ўртасидаги узвийликни кўрсатиш ҳамда келажак ҳақида мушоҳада юритишга ундаш — Ўзбекистондаги Ислом цивилизацияси марказининг муҳим жиҳатларидан бири.

Тайланд Қироллигининг Charoen Pokphand Foods Public Company Limited (CPF) компаниясининг Россиядаги ваколатхонаси Бош директори жаноб Бури Срина бошчилигидаги делегация Марказга ташриф буюриб, унинг экспозициялари, тарихий артефактлари ва замонавий технологиялар асосида яратилган музей концепцияси билан яқиндан танишди.

Меҳмонлар Марказ экспозициялари орқали Марказий Осиёнинг кўп асрлик тарихи, илм-фан ва маданият тараққиёти, буюк алломалар мероси ҳамда цивилизациялар ўртасидаги узвий боғлиқлик ҳақида маълумот олдилар.

Жаноб Бури Срина Марказ ҳақидаги таассуротларини билдириб, унинг ўзига хос жиҳати тарихнинг изчил ва яхлит тарзда намоён этилганида эканини таъкидлади:

«Биз Марказ ҳақида жуда чуқур маълумот олдик. Бу ердаги экспозициялар бизда катта қизиқиш уйғотди. Марказда жуда узоқ ва бой тарих мужассам экан. Илгари бундай масканни кўрмаган эдик.

Бу ерда тарихни босқичма-босқич кузатиш мумкин. Қадим даврлардан тортиб бугунги кунгача бўлган воқеалар, тараққиёт ва ўзгаришлар узвий боғлиқликда, яхлит тарихий ҳикоя сифатида намоён этилган.

Энг таъсирлиси, бу ерда ўтмиш, бугун ва келажак бир-бири билан уйғунлашган. Ҳар бир давр кейинги босқич билан мантиқан боғланган. Шу жиҳатдан, Марказдаги экспозициялар нафақат тарих ва тараққиёт ҳақида, балки келажак ҳақида ҳам сўзлайди».

Меҳмон Марказнинг аҳамиятини нафақат тарихий меросни асраш ва намойиш этиш, балки келажак авлод учун маърифий макон яратиш нуқтаи назаридан ҳам юқори баҳолади.

«Президент Шавкат Мирзиёевнинг мамлакат ва халқ келажаги ҳақида қайғуриб, шундай улкан ташаббусни амалга оширганини кўриш мумкин. Бу жуда буюк ва таҳсинга лойиқ иш.

Келажак авлод бу ерга келиб, аждодлари нималарга эришганини, мамлакатнинг қанчалик бой ва узоқ тарихга эга эканини билиб олиши мумкин. Энг муҳими, улар бу тарихдан келажак учун сабоқ чиқаради.
Менимча, бу фақат бугун учун қилинган иш эмас. Бу абадий қадрият сифатида яратилган. Бу ерга келган ҳар бир инсон ўрганиши, тарихни англаши ва ўзлиги ҳақида фикр юритиши мумкин.

Инсон бу ерда ўз-ўзига “Мен кимман? Биз қаердан келганмиз?” деган саволларни бериши ва уларга жавоб топиши мумкин. Шу маънода, Марказнинг аҳамияти жуда катта.

Сизларнинг мамлакатингиз учун шундай Президент борлиги, албатта, катта бахт», — деди жаноб Бури Срина.