Янги Тошкент халқаро аэропорти лойиҳаси

Янги Тошкент халқаро аэропорти лойиҳаси

Янги Тошкент халқаро аэропортини барпо этиш лойиҳаси халқаро стандартларга мувофиқлик устувор йўналишлардан бири бўлиб қолмоқда.

Давлат экологик экспертизаси марказида Ўзбекистон, Япония ва Корея Республикаси мутахассислари иштирокида ишчи учрашув ўтказилиб, лойиҳанинг атроф-муҳитга таъсирини баҳолаш ҳамда давлат экологик экспертизасини ўтказиш тартиблари атрофлича муҳокама қилинди.

Учрашувда Давлат экологик экспертизаси маркази раҳбарияти ва мутахассислари, “UzAirports” АЖ вакиллари, шунингдек, Япония ҳамда Корея Республикасининг компания ва ташкилотлари мутахассислари қатнашди.

Мулоқот давомида жумладан атроф-муҳитга таъсирни баҳолаш (АМТБ) ҳужжатларини тайёрлаш жараёни, уларни давлат экологик экспертизасидан ўтказишнинг миллий тартиб-таомиллари, халқаро экологик ва ижтимоий талаблар ҳамда лойиҳани амалга оширишдаги ҳамкорлик истиқболлари юзасидан фикр алмашилди.

Шунингдек,  иштирокчилар Янги Тошкент халқаро аэропорти қурилишида экологик хавфсизликни таъминлаш, замонавий экологик ва ижтимоий талабларни тўлиқ жорий этиш ҳамда стратегик аҳамиятга эга мазкур лойиҳани халқаро стандартлар асосида амалга ошириш бўйича ҳамкорликни янада мустаҳкамлашга тайёр эканликларини таъкидлашди.